मनातल्या मनात मी

Suresh Bhat

मनातल्या मनात मी तुझ्यासमीप राहतो

तुला न सांगता तुझा वसंत रोज पाहतो 

अशीच रोज नाहुनी लपेट उन्ह कोवळे 

असेच चिंब केस तू उन्हात सोड मोकळे 

तुझा सुगंध मात्र मी इथे हळूच हुंगतो

तुला न सांगता तुझा वसंत रोज पाहतो

अशीच रोज अंगणी लावून वेच तू फुले 

असेच सांग लाजुनी कल्यास गुज आपुले 

तुझ्या काळ्या तुझी फुले इथे टिपून काढतो 

तुला न सांगता तुझा वसंत रोज पाहतो

अजून तू अजाण या कुवार कर्दळीपरी 

गडे विचार जाणत्या जुईस एकदातरी 

'दुरून कोण हा तुझा मरंद रोज चाखतो? ' 

तुला न सांगता तुझा वसंत रोज पाहतो

तसा न राहिला आता उदास एकटेपणा 

तुझीच रूप पल्लवी जिथे तिथे करी खुणा 

पहा कसा हवेत मी तुझ्यासवे सळाळतो

तुला न सांगता तुझा वसंत रोज पाहतो

---- सुरेश भट