कृष्णएकांत

तिच्या अंगणात प्राजक्त बंदी तरी सत्यभामे ढळे तोल का ?

झाडाप्रमाणे असे झाड हेही असे सांगते ती ,तरी हुंदका ?

इथे बासरीच्या गडे आतड्याला हवा चंदनी लाकडाची नवी;

तुला रुक्मिणी का फुले वेचताना सुगंधात हि भेटते वाळवी ?

संहार आता करा यादवांचे जुनी राजधानी रिकामी करा ;

रथाला कुणी अश्व देऊ नका अन शिरच्छेद माझे कसे हि धरा

वैराण आयुष्य झाले तरीही फुलांना कुणी बोल देऊ नये;

मी बांधलेल्या उन्हाळी घरांच्या गवाक्षातला चंद्र झाकू नये .

नको धाक घालू नको हाक तोलू इलाख्यातली गुप्त झाली नदी ;

निजेच्या भयाने जसा शुभ्र होतो खुनाच्या कटातूनहि  पारधी .

जिथे कृष्णएकांत देठात प्राजक्त राधेस हा रंग येतो कसा ?

सर्वेश्वराला कधी या मुलीने न मागितला रे तिचा आरसा .

------- ग्रेस