संधीप्रकाशात

आयुष्याची आता | झाली उजवण |

येतो तो तो क्षण | अमृताचा ||

जे जे भेट ते ते | दर्पणीचे बिंब |

तुझे प्रतिबिंब | लाडे गोडे ||

सुखोत्सवे असा | जीव अनावर |

पिंज-याचे दार | उघडावे ||

संधीप्रकाशात | अजून जो सोने |

तो माझी लोचने | मिटू यावी ||

असावीस पास | जसा स्वप्नभास |

जीवी कासावीस | झाल्याविना ||

तेव्हा सखे आण | तुळशीचे पान |

तुझ्या घरी वाण | नाही त्याची ||

तूच ओढलेले | त्यासवे दे पाणी |

थोर ना त्याहुनी | तीर्थ दुजे || 

वाळल्या ओठा दे | निरोपाचे फूल |

भूलीतली भूल | शेवटली ||

--- बा भ बोरकर