थराला चालले आहे

थराला चालले आहे तुझे हे वेड स्मरणांचे 
कशाला पाहिजे ओझे तमाला चंद्रकिरणांचे 

शिकाऱ्यासारखे कोणी नये थांबूच पाणोठी 
उगा येतात रे काठी कळप व्याकुळ हरणांचे 

नदी ओंकार गाताना वृथा ही वाहिली शाई

अभंगाला पुरे होते किनारे दोन चरणांचे

क्षणाची पूर्तता थोटी मनाची सार्थता खोटी

अशाने काय उमगावे तुला कैवल्य मरणांचे

धरेचे त्या नभासंगे असे संधान आहे की

इथे ही भूक जन्माची तिथे ते राज्य कुरणांचे

अकाली षंढता येते अवेळी चेवही येतो

ठिबकते वीर्य अस्थानी करावे काय स्फुरणांचे

:- वैभव जोशी