थराला चालले आहे

थराला चालले आहे तुझे हे वेड स्मरणांचे 
कशाला पाहिजे ओझे तमाला चंद्रकिरणांचे 

शिकाऱ्यासारखे कोणी नये थांबूच पाणोठी 
उगा येतात रे काठी कळप व्याकुळ हरणांचे 

नदी ओंकार गाताना वृथा ही वाहिली शाई

अभंगाला पुरे होते किनारे दोन चरणांचे

क्षणाची पूर्तता थोटी मनाची सार्थता खोटी

अशाने काय उमगावे तुला कैवल्य मरणांचे

धरेचे त्या नभासंगे असे संधान आहे की

इथे ही भूक जन्माची तिथे ते राज्य कुरणांचे

अकाली षंढता येते अवेळी चेवही येतो

ठिबकते वीर्य अस्थानी करावे काय स्फुरणांचे

:- वैभव जोशी 

लाजून हासणे - शरमाके मुस्कुरायें

लाजून हासणे अन हासून ते पहाणे

मी ओळखून आहे, सारे तुझे बहाणे

डोळयांस पापण्यांचा का सांग भार व्हावा?

मिटताच पापण्या अन् का चंद्र ही दिसावा?

हे प्रश्न जीवघेणे हरती जिथे शहाणे

हाती धनुष्य ज्याच्या, त्याला कसे कळावे

हृदयात बाण ज्याच्या, त्यालाच दुःख ठावे

तिरपा कटाक्ष भोळा, आम्ही इथे दिवाणे

जाता समोरुनी तू, उगवे टपोर तारा

देशातूनी फुलांच्या आणी सुगंध वारा

रात्रीस चांदण्यांचे, सुचते सुरेल गाणे

                                                                           - मंगेश पाडगावकर

शरमाके मुस्कुरायें यू हसके देखे हाए

मै जानता हू जालीम सारी तेरी अदाए

बोझलसी लग रही है पलके निगाहोपर क्यूँ

उतरे क्यूँ चांद इनमे जबभी मै नैन मूंदू

ये सवाल जानलेवा जो बुझे सो मात खाए

घायल का हाल क्या है जाने भला क्या कातिल

जिसने है तीर खाए, ये दर्द समझे वो दिल

तिरछी नजर ये हमको दिवाना करके जाए

गुजरे तू सामनेसे खिल जाए तारे हर-सू

बहार-ए-चमनसे लेके आए पवन ये खुशबू

इक गीत चांदनीका फिर रात गुनगुनाए

                                                                                 - विशाल (१५/०९/२०१७)

भक्त

आकस्मिक नसे मीच ठरवून गेलो
तुला शोधतानाच हरवून गेलो

रीती जाहली ही कधी दानपात्रे
मुखी घास उष्टा मी भरवून गेलो

हिऱ्या माणकांच्या त्या झगमगत्या राती
दिपलो काजव्यापरी नि मिरवून गेलो

झाकला मी एक डोळा हासलो गाली जरासा
अखेरच्या श्वासातसुद्धा मृत्यूला चिडवून गेलो

अंतरे प्रस्थापितांची खडबडून जागृत झाली
कोंबडा उठलाच नव्हता, मी होतो... आरवून गेलो

पत्थरी देवास माझी समजली नाहीच भक्ती
तो बोलला मी फक्त त्याचे उंबरे झिजवून गेलो

-- विशाल (०३/०६/२०१७)

दुसरे काही

भासांना सहवास म्हणू कि दुसरे काही ...
आठवणींना त्रास म्हणू कि दुसरे काही

क्षणा क्षणाला मरण झेलूनी जिवंत आहे
ही जगण्याची फूस म्हणू की दुसरे काही

पुंडलिकासम दारावरती उभा विठोबा
वीट फेकुनी बैस म्हणू की दुसरे काही

कितीजणी सांगतात या जागेवर ताबा
ऐसपैस हृदयास म्हणू की दुसरे काही

नीतीच्या कुंपणात बंदी लाख श्वापदे
स्वतःस मी माणूस म्हणू की दुसरे काही

सुबक मांडणी शब्द बांधणी छंदामध्ये
कवितेला आरास म्हणू की दुसरे काही

कवी थोर पण कविता काही कळली नाही
खास म्हणू बकवास म्हणू की दुसरे काही

समुद्र मिळुनी घोटभराची तृषा ना शमली
याला नक्की विकास म्हणू की दुसरे काही

बलिदानाने दाटून आल्या आकाशाच्या
रंगाला तांबूस म्हणू की दुसरे काही

इथे तिथे अन तिथे असेल का दुसरे काही
आयुष्यभर हव्यास म्हणू की दुसरे काही

खिचडी केळी बर्फी आणि भगर संपली
एकादशीस उपवास म्हणू की दुसरे काही

दुसरे काही म्हणू कशाला मी कोणाला
दुसरे मीच स्वतःस म्हणू की दुसरे काही

--- विशाल (१७/०७/२०१७)