तू म्हणसी तैसे

तू म्हणसी तैसे सरले जर का
दोघांमधले नाते
का कविता हातून होते ?

तू म्हणसी तैसे कथा आपली
तिथेच जर संपली
का नदी नाही थांबली ?

तू म्हणसी तैसे विसरलीस जर
तू झाले गेलेले
का मेघ भरून आलेले ?

तू म्हणसी तैसे पाहून आरसा
तुला न आली लाज
का इथे कडाडे वीज ?

तू म्हणसी तैसे जर जमला नाही
एकही अश्रू नयनी
का भिजली सारी धरणी ?

तू म्हणसी तैसे या प्रश्नाचे
जर उत्तर तुजला ठावे
का तू न मला भेटावे ?

तू म्हणसी तैसे जर का याचे
तुजकडे उत्तर नाही
का दूर तू सांग अजूनही ?

तू म्हणसी तैसे पुन्हा भेटीचा
तुला नाही विश्वास
का चालू माझा श्वास ?

- विशाल (०३/०६/२००८)